Ikipe ya Rayon Sports, yitegura guhagararira u Rwanda mu mikino ya CAF Confederation Cup, yatangiye urugendo rwo kwitegura iryo rushanwa isinyisha umukinnyi mushya w’Umurundi, Prince Michel, wakiniraga Vital’O yo mu Burundi.
Rayon Sports yabaye ikipe ya mbere mu Rwanda igaragaje umukinnyi mushya yaguze muri iki gihe cy’igura n’igurishwa, aho yamwerekanye ku wa Gatandatu, tariki ya 7 Kamena 2025. Ibi bibaye nyuma y’uko isoje umwaka w’imikino wa 2024/2025 iri ku mwanya wa kabiri muri shampiyona, ndetse igatsindwa ku mukino wa nyuma w’Igikombe cy’Amahoro.
Mu mikino 54 yakiniye Vital’O FC, yatsinze ibitego 5 anatanga imipira 13 yavuyemo ibitego. Yanakiniye n’ikipe y’igihugu y’u Burundi mu mikino yo gushaka itike y’Igikombe cy’Isi cya 2026, harimo iyo bakinnyemo na Malawi, Burkina Faso na Senegal, ndetse no mu mikino ya CHAN aho u Burundi bwasezerewe na Uganda.
Uyu musore yafashije Vital’O FC kwegukana igikombe cya shampiyona y’u Burundi mu mwaka wa 2023/2024, anatoranywa mu bakinnyi 11 beza b’iyo shampiyona.
Prince Michel wakiniraga Vital’O yo mu Burundi
Rayon Sports ikomeje kwiyubaka yitegura umwaka w’imikino wa 2025/2026 uzatangira muri Kanama, n’imikino Nyafurika. Ibi bibaye mu gihe bamwe mu bakinnyi bayo barimo Bugingo Hakim na Iraguha Hadji bamaze kwerekeza muri APR FC.
Aline Nyampinga